طقت ف دماغى اصالحك
وساعتين زمن اسرقك
واتوجك على قلبى اميرة
واوقعك يا حلوة فى حيرة
ده مين ده مش عارفة !!
مجنون ولا طاقق مش فارقة
المهم نهرب م الكابوس
ونحلم بقى حلم تفصيل
اعملك فيه قمرايه فى احلى ليل
او نيل صغير وناى وصبر ومواويل
هكتبك رواية واخد فيكى نوبل بجدارة
وارسمك ورداية بعيون جميلة ومحتارة
ولا اقلك هشكلك تفاحة ادم واكلك عشر مرات
واطلع من الجنة وانزل لارضك ماانطق بآهات
او هشوفك نقطة ندى تبل ريقى وقت العطش
او توبة لربى ابطل فيكى كدب ونعر وبكش
هعملك لحظة تأمل وانا فيها عالم جليل
واكتشف دوا لعلاج الصعب والمستحيل
ولا اقلك .....
هعملك صحرا واسعة أتوه فيها بالعانى
او قصيدة حلوة فيها كل المعانى
هعملك جناحين اطير بيهم فى الفضا
واخر الكل هعملك قبرى واموت فيكى
واكتب عليه هنا قضى نحبه وانقضى
ليست هناك تعليقات:
إرسال تعليق