أرنم لإلهى مادمت حياً

اسمح لى يا رب ارنم لك وفى حبك اكتب ترنيمة مهما كنت محاط بصعاب ومهما كانت تجربتى أليمه

على كلماتك هارمى الشبكة ... وأدخل الى عمق الايام

انـا بوعودك واخد بركة ... مش راح تملكنى الأوهام

أنت ياربى ينبوع خير ...زادى وعزى مجد وفير
أنت المالك كل حياتى ... أنا أفضل عندك م الطير

انت امين والعدل ده صفتك ... مهما شرور الناس بتزيد
أنت الصادق حقق وعدك ...أبنك مستنى الـمواعيـــد

أنت ابويا الحانى عليا ... مهما ابليس غرقنى خطية
تمسح كل آثامى فى لحظة ...وتفتح م الظلمة عينيا

عايش ولا مات
وحشنى كل شىء ...برىء كان أو مش برىء
صديق أوحتى مش صديق
وحشنى صوت الجيران ....صوت الدق ع البيبان
وحشنى صوت الهوا بيخبط فى شباكى
وحشتنى دموعى وانا باكى
وحشتنى ضحكتى وانا فى براءة الأطفال
وحشتنى هيصة الولاد ....لعب الصبيان والبنات
وحشنى الهدوء ...وحشتنى الخناقات
وحشتنى وشوش العجايز وعيونهم وايديهم وهى بتعمل على الشمس حاجز
وحشنى صوت المطر ...... ونور القمر
وحشتنى كتلة السحاب ...وحشتنى لفحة الشمس
وحشنى ضل الشجر .......
وحشتنى الشوارع والميادين .........وقلوب الناس المحبين
وحشتنى الكلمات والمعانى اللى تاهت
وحشتنى كل الذكريات
وحشنى اللى عايش واللى مات
وحشنى الكلام ...وحشنى السكات
وحشتنى الدموع وصوت الأهات
وحشتنى رنة الضحكة فى الفضا
وحشنى صوت الصدا ......وحشتنى بجد الأنفعالات
يا ترى كلامى معناه انى عايش ولا هيقولوا عليا ....مات

للبيع

إعلان عن بيع الطول والعرض

وحيطان البيت وتراب الأرض
إعلان عن بيع الأنسان .... بيع الأحلام والألوان
إعلان عن بيع الضحك وبيع الدمع اللى بجد
إعلان عن بيع الوجدان
إعلان عن بيع القلوب الصحيح منها والمعيوب .
إعلان عن بيع العيون ... اللئيمة والطيبة والعاشقة والمحتارة الصديقة والعدوة ......
إعلان عن بيع الأفكار و المعانى والقيم اللى كانوا زمان كبار
إعلان عن بيع الحب .... عن بيع الطريق والدرب
بس مش دعوة للتوهان
يمكن يأس من أنسان ؟؟ جرب وعاش فى عصور زمان ...مكنش فيه قلب بيكدب
هنقول كمان

إعلان
إعلان عن بيع الأحاسيس الغالى منها والرخيص ...ملهاش لازمة ماخلاص على قلوب البشر مكتوب ( هنا واحد خان )
إعلان عن بيع الوشوش .. وش ساخر .. وش شر ...وش طيب ...وش بشوش
إعلان عن بيع الشخصيات ... عاقل.... ماكر .... صح ...غلط ... وبتاع حركات
إعلان عن بيع الأنفعالات ...بيع الضحكات والبسمات بيع الضمير اللى انخرس ..
إعلان عن بيع الكلمات والأشارات بيع الألفاظ والعبارات
إعلان عن بيع الحكايات والحواديت والخيال
إعلان عن بيع السهل والصعب والمحال
مش قلنا إعلان عن بيع الأنسان

هنا المزاد............ . يا اخوانا هنا المزاد............ ..... حد قال هات

ما تسكتيش

ما تسكتيش
سكوتك معناه سكوت كل الكلام
ما تستسلميش
وتحطى للسانك لجام
خلى الحروف تتحرر من بين شفايفك
كلامك هو اللى بيخلينى أحس انى شايفك
ماتسكتيش
صمتك معناه انى مش هعيش
لما يبقى كلامك هوا اتنفسه
كنز انا بحرسه
يبقى أغلى من كل كنوز الكون
إيه ؟ بتقولى إيه ؟
سامعـــــــــــــــــــك
بتقولى مجنون
ومين يا حبيبتى عاقل يرضى بكلام غيرك فى ده الكون
ما تسكتيش
صمتك معناه حكم على بأني خلاص
مش هعيش
حررى ابتساماتك
ضحكاتك ..... انفعالاتك
واهزمى صمتك ...وسكاتك
ما تستسلميش
أوعى تقولى جواكى
بيا أو من غيرى هيعيش
ضيفى للحياة معنى بصوتك
بحروف كلامك
دمرى حصن خوفك
وافتحى بوابات سجن حروفك
ما تقلقيش
الكلام هيحيكى
والضحكة ما هتموتكيش
حبيبتى رجاءً
ما تسكتيش

انا بعت دى تانى لان الخط كان صغير اوى والصورة مش عجبانى

بدون عنوان

على شواطىء جزرى لن أقبل سفنا غريبـــة
وفــــــــى أجــوائى لن أسمح بطيور غريبة
تعالى وأبحثى فى بحـــــارى و محيطــــــاتى
لــــن تجـــــــدى غيـــــــرك حبـــيــبـــــــــة
لــــــــن تفلـــــح ديــــــارى لسكنى غيــرك
لن تبـــحر سفنى إلابشـــــراعك وقلاعــــك
لـــــــن أحــــارب إلا مـــــن أجل حريتــــك
لن تشرق شمسى إلا على أراضيكــــــــــى
ولـــــن يسطع بــــــــدرى سوى فى لياليكـى
ونجومــــــى لــــن ترشـــــــــــــد إلا عينيكى
ولـــــــن أســــرد قصصاً ســــــــوى حكايتك
ولـــــن تلمــــــس يداى إلا أوتــــــــارعودك
ولن أغنى أشعــــــارى إلا بألحانــــــــــــــك
لن أشدو ترانيمى سوى فى محرابــــــــــــك
لن اكسر صوما فرضـــــــــته على نفســـــى
لتكــــونــــــــى انتـــــــــــــى الحيــــــــــــاة
التــــــى لــــــن أحيـــاهـــــــــــا بدونــــــــك
سأهجــــــر كــــــل مــــــــــــدن الحــــــــــب
ولــــــــــن أسكــــــــن إلا فــــــــى مدنــــــك
لــــــــن أقـبــــــــــل تيـــــهــاً إلا فـى دروبك
لـــــــــن أقــبـــــل عطــــــــــايـا غيــــــــرك
لــــــــــــــن أرتـــــوى إلا بمـــــــــــــــــاءك
ولــــــــن أشــــــــبــــــع إلا مــن خبــــــــزك
لن يغمـــــــــض لـــــى جفنا إلا فوق وسائدك
ولــــــــــــــم ولـــــن أحلــــم إلا بــــــــــــــك

أنا ما لقتش عنوان للكلام ده .......لو حد يعرف يديله عنوان يا ريت

أنتى مين ؟

انتى مين ؟؟
نفسى اعرف انتى مين ؟؟
شخص واحد ؟ روح واحد ؟
مش اتنين ؟
ساعات بحس انك بحور من غير شطوط
واللى يبحر فيها هالك هالك مصيره موت
وساعات بحس انك جزيرة
شط نجاة مصدر حياة
انتى مين؟
شخص واحد . مش اتنين ؟
ولا مرة الاقيكى ضلمة
ايوة
عتمة
مش شايف فيها شىء
ومرة تانى احس انك نور
نور...... نور لى الطريق
انتى مين ؟
واثقة انك واحدة بس مش اتنين ؟
مرة احس انك خيال
انك صعب
شىء محال
ومرة احس انك قريبة
جوة منى
يعنى لو ممكن اقول
هقول
أنك حبيبة
بس قولى
بصدق قولى
انتى مين ؟
شخص واحد ولا اتنين ؟

حــديـــقـــة الـــورد

كان يحب دوما أن يعيش فى هدوء . لا يطيق ان يحيا بدون الحب . احب دائما كل شىء وكل الناس . كان دائما يحلم أن يختلط بالطبيعة بعناصرها . أحب البحر , الخضرة , الصحارى , الرمال , السماء , المطر, الشتاء ,الطير , النجوم . يوما ما أنعزل عن كل الناس فى هدوء فى مكان هادىء بعيد . سكن كوخاً صغيرا ً وزرع حوله انواعا مختلفة من الورود . وكانت كل مجموعة من الورود تعطى عبيرا يحمل معنى من معانى الحياة , فوروداً برائحة الحب , ووروداً برائحة السعادة , ووروداً برائحة الرجاء . واصبح يرسل هذه الورود يومياً لمن أحبهم ومن يعرفهم ومن لايعرفهم . استمر فترة طويلة حريصاً ومهتماً وحديقته تمتلىء وتمتلىء . وتعود الناس على الورود واحبوها

وذات يوم ...... بدأ الناس يتسائلون عن مرسل الورود . .. من هو ؟ وما هيئته ؟ راود هذا السؤال الكثير ممن يستقبلون الورود . وظل يسيطر عليهم ...... حتى جاء يوم وبدأوا يفكرون فى الذهاب الى المكان الذى تأتيهم منه الورود ..... وبالفعل أجتمعوا فى ذات صباح واتجهوا الى المكان ولما وصلوا اليه وجدوه محاطاً بسور عال طرقوا بابه وانتظروا وانفتح الباب على انسان بسيط جدا فى هيئته يطل من وجهه هدوءاً شديداً والناظر لعينيه يرى عمقاً وزمناً بعيداً . وجه أحدهم له السؤال (( نريد أن نقابل مرسل الورود ؟؟)) أجابهم بصوت هادىء (( أنا هو )) سرت بينهم همهمات ونظروا لبعضهم البعض وقال اكثر من واحد (( أنت !!!)) أجاب (( نعم ,أنا ))

(( لكنك لا تحمل اي شىء مختلف عنا ولايميزك شىء .أنت مثلنا بل أقل منا ايضا ً ........))

انصرف الجميع ولم يلتفت أحد اليه .........

ووقف هو حزينا ناظراً اليهم وهم يبتعدون

ماذا كنتم تتوقعون ؟؟

اغلق بابه

ونظر لوروده فوجدها حزينة مثله

وعندما اشتم عبيرها لم يجد لها اى معنى

فاغلق بابه ومن وقتها لم يزرع فى الحديقة سوى زهرة واحدة

زهرة البنفسج

الراحل بلا عودة

أنا أحيا على جراحي
واستقى من عذابي
لم انطق يوما كلمة لا
ولم أعاتب غدر هذا الزمان
فلا حبيب وفى بعهد
ولا صديق أشفق حين خان
أنا الأسير لوهم الوفاء
ومريض وليس بى داء
فان ضحكت لى الدنيا
لم تكن إلا ابتسامة صفراء
وان حنت على ألمي
كانت كالحية الرقطاء
تدس السم في كياني
وتسير بريئة في خيلاء
أنا أسير وهم الوفاء
الراحل وليس من يسأل
والذاهب وليس من يتمنى لى عودة
دعك من جنوني ويأسى
وارحلي
عنى
وانسني
روميــــــــــــــــــو

حب الأطفال

أنا طفل فى محبتي فلا تلوميني
أنا طفل فى اشتياقي فلا تعنفيني

إن صحيت يوماً طالباً رؤياك حالاً
فلا تنعتيني بالجنون ولا تزجريني

وان ركضت نحوك مترنحاً كالأطفال
فلا تندهشين ولا تصديني

وبين الناس إن ناديت باسمك
ملوحاً بيدى .. صائحاً حبيبتي
فلا تغضبين ولا تتركيني

وان رسمت على الجدران قلبينا
وحرفا اسمينا بها
فلا تخجلين ولا تنهريني

أحبك فوق الـمحـبـة حـبــاً
فهل تدركينه وهل تفهميني ؟

معايا

معايا .... ودايما كده ..... معايا
جنبى أيوه ....... مش ورايا
تسندينى مرة ...... اسندك مرة
وفى كل مرة
تكونى ايه ؟ ........أيووووووووة
معايا .........جنبى كده ومش ورايا
مرة تتشبك ايدينا
وتكون عيننا
على هدف واحد ......مش اتنين
ومرة نشب لفوق شبة
نلقى روحنا ..... حبة حبة
هنطول اجمل نجوم
وتقولى لى وأنا اقولك
اييييييه؟
معايا
جنبى ايوه ...... ومش ورايا
و مرة .... نحلم الحلم نفسه
من أوله .....لحد أخره
تصحى انتى
وافوق انا
اجرى عليكى وتنادينى
وأقلك وانتى تقوليلى
اييييه ؟
كنت معايا
جنبى ايوة ........ مش ورايا
ولا يااااااه
يوم ما احبك
وارفع عنيا عنك للسما
ولاقى فيها برضه وشك
نجمتين دول عنيك
سحابة بيضا ده جبينك
ولون شمس حمرا بتغرب دول خدودك
كل ده ..... وانتى ......ايه ؟
معايا ....... ايوة معايا
دايما معايا
جنبى بس و مش ورايا

أين حبى ؟

من زمن سيدتى
ابحث عمن تشاركنى جنونى
ترقص معى تحت الامطار
وتشرب من بين كفى
ماءً لا يمنحه ينبوع او نهر
تسافر معى حتى القمر
دون سفينة
تبحر معى فى اهوال
ولا تخشى شىء
لانها فوق صدرى
تدرك معنى الامان
دقات قلبى تؤنسها
كموسيقى عازف ماهر
ضوء عيناى يرشدها
كالف نجم .... ونجم
شفتاى تمنحها يوماً أخر فى الحياة
صوتى...يجذبها
من وادى الموت
الى واحة الحياة
وذراعى تلتف حولها
كسياج من الامان
حين تلمسنى
تنسى ان هناك شتاء ًورياحاً
فدفء احاسيسى يغمرها
تهرب من العالم الرحب
لتسكن مدنى
تنسى النوم
لئلا تضيع لحظة بدون رفقتى
ترقص وترقص كلما راتنى
فترقص معها كل الدنيا
تتمايل فتتمايل الاشجار
تهمس فتغرد معها كل طيور الكون
تفرد ذراعيها
فتحتوينى و تمنحنى
رشفة .... من نهر الحياة
لا ادرك معها سوى الحب
لا احس معها سوى معنى الحياة
تكون مليكتى
وانا
فارسها
الأوحد

طيارة ورق

نفسى ابقى طيارة ورق
و أطير لفووووووووووق
والخيط اللى ماسكنى يتقطع
والهوا ياخدنى لفوووووووق كمان
فوق السطوح ....... بين السحاب
وسط النجوم..........الف وادور
ولما اتعب ........انام فى حضن القمر
بس بشرط ميكونش في بشر
لان هنا مكمن الخطر
هيقولوا ضاع !!
ما هما سبب الضياع
هيقولوا باع!!
ومين اشترانى عشان مابيعوش
كله غش ونقش ولون ع الوشوش .
معاك تاخد معاكش ميلزموش ليه الحب اختفى ؟ وضاع الوفا
ليه الأخلاص مش حقيقة ؟؟
والخديعة لابسة توب البريئة ؟؟
عاوز ابقى طيارة ورق .
والخيط يتقطع بس مين هيقطعه؟؟؟؟؟؟

حبيبتى سامحينى أنا قطعت صورتك

حبيبتى سامحينى أنا قطعت صورتك

سامحينى يا حبيبتى ... أنا جبت صورتك قدامى
وحبيت أكتب فيكى قصيدة حب
لكن أعذرينى ... لقيتنى بكتب عن كل معانى الكدب
كدب العيون .. اللى سبق كدب الكلام
زيف المعانى اللى عيشنى سنين فى أوهام

سامحينى يا حبيبتى جبت صورتك قدامى
عشان أكتب فيكى قصيدة حب
لقيتنى بكتب عن معنى الخيانة
عن الاستهانه .. عن ضياع معنى الأمانه

فاكرة كام مرة خنتينى؟؟
عدد صوابع ايديكى العشرة
ولا أكتر .. ولا ناسية
هتقولى ببراءة .. مش فاكرة !!

كام مرة سامحتك . وغسلت عنك
وحل توبك .. ورجعتك ..وأمنتك أمانة
تبعدى عن الخيانة
وفى كل مرة كنت بلمح برضه ابتسامه
صفرا ...مفيهاش ريحة السلامة
واصرار عنيد ..ورغبة بتأكيد
راجعة تانى ..لوحل تانى .. بشكل تانى
بخبث ولائمة

سامحيني يا حبيبتي قطعت صورتك
وحرقت كل قصايد غزلك
وقعدت وحدى ........ أيوة وحدى
أحاول أفتكر ملامحك

طب وليه ما أنا كان فى أيديا صورتك
يلعن دماغى وأيدى السريعة

ويلعن قلبى اللى ما هدى حتى دقيقة

سامحينى يا حبيبتى ممكن صورة ليكى تانى
يمكن المرة دى ألاقى غير كده معانى

إهداء منى لكل واحد كان وفى واتقابل وفائه بالخيانه

كلاكيت الف مرة ومرة

تخيل معايا كده انك فتى عندك 17 سنة فى 3 ثانوى يعني وفى يوم كده خلصت روتينك اليومى ودخلت بالليل الى سريرك منهك وتعبان بعد عناء يوم شاق من المدرسة والمذاكرة والدروس الخصوصية .
حضنت مخدتك كالعادة وغمضت عينيك وانت تحلم بانتهاء كابوس الثانوية العامة وتفكر فى طموحك فى انك تدخل كلية مرموقة ( زى ما بيقولوا ) من كليات القمة وللحظات استسلمت لحلم يقظة شوفت فيه مستقبلك كما تتخيله ........

ووسط ده كله غلبك النوم ونمت وتعمقت فى النوم جدا و ...........
(( اصحى يا بنى ميعاد الشغل )) ده صوت مامتك بيصيحك
تقوم بتكاسل كده و تقول ( يا ماما النهارده اجازة م المدرسة )
وتفاجأ بصوت ماما بيقول
( مدرسة ايه يا بنى !! انت مفوقتش ولا ايه ؟ يلا هتتأخر على شغلك )
ترن كلمة شغل داخل عقلك كجرس منبه رخم من المنبهات الصينى بتوع اليومين دول .
شغل!!!!!!!
وتتردد جواك الكلمة كصدى صوت زى اللى كنا بنعمله زمان واحنا صغيرين قدام العمارات الفاضية لما كنا بننادى على اسامينا ونلاقى حد بيرد بنفس النداء.
للحظات تحس انك كنت فى غيبوبة وبعد جدال مع نفسك شوية كده ..تجد نفسك بتقوم بعمل حاجات لا ارادية .. انت مش عارفها بس متعود عليها
بتلبس وتفطر وتنطلق من بيتكم
تنزل الشارع فتلاقيه مش هو بتاع امبارح وانت راجع من حصة الأنجليزى ده اتغير !!
تكمل فى الطريق ورجليك هى اللى ماشية مع نفسها
تتجه الى محطة الميكروباص ويعدى أكتر من واحد

والصبيان بينادوا لمناطق مختلفة ..

لكنك لا تهتم لغاية ما واحد ينادى لمنطقة معينة تجد نفسك مسلوب الارادة تتجه نحو الميكروباص وتركبه
تفضل طول الطريق مش عارف رايح فين وشارد فى سؤال بياكل فى تلافيف مخك
هو ايه اللى بيحصل ؟؟؟ انا رجعت م الدرس امبارح ونمت و.....
يقاطعك صوت الصبى بتاع الميكروباص
( محطة ... يا جماعة اللى نازل يقرب ع الباب ) وتلاقى نفسك برضه بلا وعى تقوم وتنزل تبص يمين وشمال وتلاقى نفسك برضه مستسلم لرجليك تاخدك لمكان مألوف ليك لكن انت مش عارف ليه ؟
بتصبح على الناس الموجودين وهمه كمان يصبحوا عليك باسمك . الغريب بقى مش انهم بيصبحوا عليك باسمك . لا الغريب انك انت عارف اساميهم وبتنطقها مع كل صباح الخير يا فلان
رجلك برضه بتاخدك وتقف قدام شخص يميزه لك عقلك ( ده صاحب الشغل )
( ايه يابنى انت مش نايم ولا ايه ..؟؟)
للحظة تصيبك حالة بله لكنك تجيب لا اراديا برضه
( لا ابدا شوية تعب من شغل امبارح )
شغل امبارح ؟؟؟؟؟؟ تفاجأ انك نطقت الجملة دى
وتقول لنفسك انا كنت فى الدرس وروحت و....
يقاطعك صوت هذا الرجل اللى عقلك ترجم انه مديرك
( طب يلا يا سيدى استلم البضاعة واطلع مع عم ( .... ) السواق الاستاذ اللى هيقابلك هيديلك 500 جنيه ومتنساش ............ ......)))
هتلاقى نفسك بتسمع كلام مألوف لكنك برضه مش عارف ايه اللى انت فيه !!!!!!

( سمعت يا بنى انت معايا !!!!)
ترد بتلعثم ـ حلوة تلعثم دى مش كده ـ
أأأأه ايوة ...... اوك
( أوك ؟ أوك إيه ؟انت لسه عايش لى فى دور الدكتور يا عم فوق )
تمشى من قدام الشخص ده وانت محتار من الالفة الموجودة مابين صوته وودانك وتتجه ناحية عربية ربع نقل من بتاعة نقل البضايع دى وتسلم على راجل طيب كده كبير فى السن و تركب جنبه وطول الطريق يفضل السؤال
الغريب يلح عليك
( هو ايه اللى بيحصل ؟؟)
تخلص شغلك وينتهى اليوم وترجع لبيتكم وتدخل جرى لسريرك وتحتضن مخدتك أملا فى انك تنام وتصحى ويكون اليوم اللى عدى ده كله حلم
وتروح فى النوم
وتصحا على صوت ماما تانى .
(((اصحى يا بنى هتتأخر على الشغل ))
وتلاقى نفسك فى نفس الدائرة من تانى
ويرجع السؤال يلح عليك وكلما قابلت شخصا يعرفك ويسألك أخبار الشغل ايه ؟؟
تقول شغل !!انا امبارح كنت راجع من حصة الانجليزى ونمت و
ياترى فهمتوا ؟؟؟؟؟
عشان خاطرى اللى فهم يبقى يفهمنى
ايه اللى حصل ؟؟
صدقونى امبارح كنت راجع من حصة الانجليزى ونمت و............ ......... ......
يوووووووووو
بعد اذنكوا صاحب الشغل بينده عليا

الحياة توبه

توبـــــــــــــــــــــه

لو رجلك خدتك لغاية ش الجيش فى العتبة . على اليمين كده قبل تسيباس بشوية . هتشوف توبه

توبه طفل مصرى ....... لا أعتقد انه تعدى الحداشر سنة .... واقف وسط زحام العتبة المعهود ....على عربية يد وفوقها صنف واحد بس(( ترمس بلدى مملح )) .

ركنا العربية قدامه انا واخويا بعد استئذان توبه طبعاً وبعد وعد منا اننا لن نطيل الوقفة عشان منعطلش مسيرة عمله .

رحت له وطلبت منه ترمس وفى ثقة رجل بائع بدأ بعرض بضاعته واسعارها وأحجام الاكياس اللى تناسب كل سعر

والاضافات اللى ممكن يضيفها من ليمون ودقة وشطة او ملح .

أخويا جه وبدأ مناوشة معه من حيث ان حجم الكيس لا يناسب السعر وكان بيخفى ضحكته لأنه عاوز يثيره ويشوف هيعمل ايه؟

وكان توبه أسداً حامياً لما بين يديه من لقمة عيشه . فرفض حتى ان يضيف ولو قليلاً لمحتوى الكيس الصغير .

كنت اراقب الموقف وداخلى فضول ان اعرف كل شىء عن هذا التوبه

ذهبت إليه وداعبت وجهه بأصبعى فوجدت الرجل الذى كان يصد أخى منذ قليل عاد إلى طفولته

وابتسم لمداعبتى ابتسامة بريئة خرج بها من ذلك الإطار الجدى الذى غلف نفسه به ليصارع هؤلاء الزبائن على مختلف أشكالهم

وسألته : اسمك إيه .؟ فقال : توبه .

طبطبت على كتفه وقلت له انا راجع بعد شوية حضر لى كيسين تانى .ممكن تظبطهم كويس عشانى ؟؟

ابتسم ووعد بانه هيظبطهم

خلصنا مهمتنا وعدنا

واخدت منه الاكياس اللى وعدنى بيها

ومشينا

وعينى لم تفارق توبه

وهو يجادل الزبائن

في أنه

من حقه أن يحدد الكمية المناسبة لحجم الكيس وسعرها

توبه

طفل من آلاف الاطفال الذين زج بهم إلى نهر الحياة قبل أنتصاب عودهم

توبه هو الحياة المصرية الأن

توبه

درس من دروس حياتنا

توبه كاركتر لا يمر عليك بسهولة

سلااااااااااااااااااااام

ودخلنا عالم المدونات

مكدبش عليكو شعورى زى ما اكون بتعلم أ . ب , بصراحة تايه شوية

لكن فرحان ,,, مساحة جديدة هتنفس فيها بعيد عن حاجات كتير

هرغى براحتى , يمكن محدش يقرالى غير نفسى , بس وماله هرغى برضه .

وهكتب بقى ,,,,

إلى كل أصحابى بحبكم