اتولد يا حلم

إتولد يا حلم ...انشالله قيصريه

ندرٍ لو اتولدت ..لاحنيلك ايديا

واكحلك بفرحى .ومن دموع عينيا

وازغرطلك ماهتعب انشالله للفجرية

إتولد يا حلم ..وفرّح العيال

وهات معاك الخير.زى الكتاب ما قال

متعندش يا حلم وخليك مرة أصيل

وحشنا أوى النهار ..تعبنا من طول الليل

إتولد يا حلم ..وهتلاقى فى انتظارك

أحضانا مفتوحالك و قلوبنا هى دارك

ماتغبش يا حلم.... تعبنا من الاوهام

بولادتك أنت بس هتتحقق الاحلام

إتولد يا حلم ...و انشالله قيصريه

ندرٍ لو اتولدت ..لاحنيلك ايديا

أنا أعلم

أنا أعلم أنك تخُطين فى خارطةٍ غير خارطتى
وأنك تروين قصصاً سحرية لغيرى سيدتى
وأنا أعلم أنك لونتى حياةً غير حياتى
وزرعتى وروداً ورياحيناً وما استخدمتى فيها أدواتى
وكتبتى بيوتاً شعرية وحذفتى جميع عباراتى
وشدوتى لحناً مضنياً وبعدتى عن طرب آلاتي
وذرفتي دموع تماسيح وسبحتي في بحر عبراتي
وضحكتي ضحكا سُخرياً وطفيتي وهج بسماتي
وأزحتى أحلامي بعيداً فسألتكي أشحتي بيسراكي
وتعبت فجئتك راجياً فصُفعتُ بقوة يمناكي
ورميتى بذار الشعر لغيرى وما عدتى الأن ملهمتى
أنا أعلم أنك أبحرتى فى سفن ٍ غير مركبتى
ورحلتى فى ركبٍ أخر وهجرتى عن عمدٍ قافلتى
أنا أعلم أنك أديتى صلاة و تبعتى حباً ليسا بمعتقدى
وسبحتى تسبيحاً أخر قد خلا من قدس كلماتى
أنا أعلم أنك محوتى اسمى من فوق جبينك بيداكى
وطعنتي سيفا مغموسا في رحيق الغدر بخاصرتى

أنا و أنا

إمبارح بالليل وانا سهران الليل ........لا لا مش مطلع أغنية ( فضل شاكر ) ....ده بجد كده أو مش بجد ماعلينا بقى كله محصل بعضه
كنت بتفرج على روتانا زمان بعد يوم عمل مرهق ...قال يعنى فيه فى دنيتنا عمل مش مرهق.... المهم ماطولش عليكم ..قولوا طول

كنت بمنى نفسى بفيلم من افلام حبيبى سمعه أبو ضحكة جنان ويكون معاه كيتى مثلا ولا كاريوكا ولا أى واحدة من اللى بجد تبصلهم وتترحم على الأنوثه ( لامؤاخذه يعنى ) .
طول فترة الاعلانات خلتنى امل شوية قلت وماله نديها شوية عصيرتانج ...حكم انا مافيش عمار بينى وبين الشاى .
فتحت كيس التانج عبوة واحد لتر وفضيته فى إزازة ميه لتر برضه.....ورجيته كتعليمات الطبيب ..عفوا زى ما مكتوب يعنى ع الكيس

وافتكرت واناعينى على الميه وهى بتصطبغ ( واحشنى يا صباغ ) بلون البرتقان ...الحاوى ابن اللذينه ..اللى شفته زمااااااااااان فى سوق التلات فى المنيب
أما كنت مفعوص وماليش فى لعب الكورة كنت بروح أدور على الراجل اللى بيبيع مجلات ميكى وسمير القديمة بالكومه كده..

كان الحاوى ده يقعد يغير لون الميه يقلنا ده بقى شاى بلبن ...بصوا بصوا ده كركديه ....وااااااااادى ليموناته ...ويفضل يقلب الميه من كوبايه لكوبايه والوانات الميه تتغير .واحنا زى الهبل ....وليه زى ؟؟؟ ما علينا
جهز التانج وصبيت أول كوبايه من اللتر......و لسه بقول يا هادى وعينى بتراقب تتر فيلم حسن وماريكا بتاع سمعة قولت عااااااااال

ببص لاقيتنى جيت من واريا .....بصيتلى كده وركنت الكوبايه على جنب ....وقلتلى أهلاً ....قالى أنا ...إيه متضايق انى جيت ؟؟
قلتلى ..لاأبدا بس مش وقته يعنى ...أنا تعبان طول اليوم ..وعاوز افرفش شوية قدام الفيلم .....قالى أنا : ماهو أنا مش عارف أتلم عليك طول اليوم
نفخت كده نفس ضيق وقلتلى : اتفضل خير ..... أخد أنا كوباية التانج من قدامى وقالى : إهدا بس كده ...أنا جاى اسألك سؤال وهامشى على طول

قلتلى: اتفضل .....اسأل ....شنف أذانى . قالى أنا : بدون تريقة لو سمحت ...ده موضوع جد .
بصيتلى كده وقلتلى ...يعنى مهزرش معايا ؟؟؟ ......قالى أنا : اسأل ولا أمشى ؟؟ ...لقيتنى بيكلمنى جد كده قلت أشوفنى مالى
قلتلى : لا يا سيدى قول.......بصلى أنا وقال: هو انت لما تموت أنا كمان هموت.
قلتيلى وانابهز راسى علامه على انه سؤال عبيط : أكيد يعنى ده شىء طبيعى.........قالى أنا : طب ولورحت السما هانا هروح ..؟؟ ولورحت النار ..أنا هروح ؟؟

قلتلي: أنت عبيط يا بنى .....أه طبعاً.........بص لى انا وقال : طب انا ذنبى إيه لو رحت النار ؟؟؟ .....قلتلى : إحنا هنهرج ولا هنستهبل !! مانت معايا فى كل حاجة......قالى أنا : لا أنت بتاخدنى معاك فى كل حاجة بس انا كتير ببقى مش موافق وبقلك بلاش نعمل دى أو دى وانت بتصر وبرضه بتنفذ رأيك .
قلتلى: تقصد إيه ؟؟؟


قالى أنا : شوف بقى أنا زهقت ومليت وبصراحة كده حاجات كتير انت بتعملها ومواقف انا مش راضى عنها.وانت عارف ده وبتتجاهلنى
انا مش ذنبى انى انصحك ومتسمعنيش...ومش ذنبى أحاول أمنعك وتعاندنى وتنفذ رغبتك ...وكتير بقلك نعمل حاجات حلوة تأجل وتطنشنى وكتير افكرك بغلطاتك وانى كنت صح لما قلتلك ومش بتهتم وكتير لما كسلت فى مستقبلك عنفتك وقلتلك خد بالك ...فاكرلما اخترت غلط كليتك ودراستك ؟ فاكر لما اخترت غلط حبيبتك .....فاكر شغلك واختيارك لحاجات غلط فيه .وحياتك مع ربنا كمان فاكر لما .......


صرخت أنا : بسسسسسسسسسسسسسسسسسسسسسسسسس

سسس....إهدا مالك
سكت انا وانا وطفيت التليفزيون والنور واديت ضهرى لأنا ونمت ونام انا .
ولما صحيت لقيت دمعتين من انا على المخدة ....مسحت دمعى انا وابتسمت أنا لأنا وقلتلى أنا صباح الخير... يوم جديد ...ممكن نتصالح ونحط الايد فى الايد
وعشان انا طيب أوى رضى عليا انا وقالى هديلك فرصه تانى يا أنا. بس متحسسنيش دايما ان انا عن انا بعيد .

اللى يصبر ينول

تظلمنى ليه يا زمن ؟
وأنا كنت ابن أصول
قبضت فيا كام تمن ؟
عشان الأندال منى تنول
تظلمنى وعارف همى ؟
وهان عليك دمعى ودمى
تظلمنى وما تستحى
ومن دفاترك ترضى انمحى
ماكان العشم يا زمن
عشرة السنين تزول
ربك كريم يا زمن
وبكره تيجى لحدايا
وبعلو صوتك يازمن تقول حقك عليا
عرفت قيمتك يا خلى
وحقك راجع وانا المسئول
وصدق اللى قابلينا و قالوا
بكره اللى يصبر ينول

**************************
**********
نصيحة : ياريت اللى يقراها يقراها صعيدى يعنى يعطش الجيم ويقول القاف جيم

حيرة نفس

أنا لست بعالم نفسى أو اجتماعى أو حتى دارساً لأيا من هذه العلوم لكن ما سأطرحه هنا هو نبض واحاسيس وخلجات صدر ترافقنى وأسئلة تموج وتعصف بذهنى تأخذنى لقمة القيم الانسانية وتهوى بى لقاع الرغبات البشرية على مختلف أوجهها .تأخذنى فى رحلة أعود بعدها منهك القوى .. نفسيا جداً
أشعر بأنى كنت أركض ساعات طوال .. .تثبت عيناى فى جهة معينة وكأنى أبصر ألاف المشاهد تتلاحق بسرعة عجيبة .

تبرق فى ذهنى أحلام و أقوال ومواقف و أشخاص .... أنفعل حد البكاء , أبتسم بسمة الدهش .
أصل حد القداسة و ألهو لهو الماجن .. لحظات ..... هى لحظات
أدور فى دوائر .... أحارب ..أناقش... أجادل ....أنفعل
أجهش فى بكاءٍ مرير ......ويعلق ذلك السؤال اللعين فى فضاء ذهنى سابحاً....ماذا أكون ؟؟
ومابين عقل وجنون يتردد سؤال ..أكون أو لا أكون ؟؟؟

نحن جميعاً فلاسفه ...أطهار ..أبرار ...وأيضاً جميعنا لاهون...خطاة ...حمقى
ولكم أعجب لغموض ..تلك النفس البشرية
ولكم تأخذنى الحيرة حين أجدها منتصبة فى قداسة أمام الخالق تدعوه وتضرع له فى خشوع ....ثم أعجب وينعقد لسانى حين أجدها لاهية..غير عابئة بأى مقدسٍ أو عفيف .

ولكم أعجب حين نقف على أعتاب قيم الحق والخير والجمال , ثم نهوى فى رزائل الشر متضامنين ومتحالفين مع صانعه دون أدنى شعور بالخجل.
وفى لحظات نضع أيدينا فى ماء التطهير وننفض عنا كل بغيض ونعود من جديد نرفع رايات العفة والشرف موقظين داخلنا ضمائر مطاطة تستوعب هذا وذاك .

نلوم ونداهن ....نكر ونفر ....نسترضى وننتهر
أعجب لنفس خلقها باريها وسواها وجملها ....فتحالفت مع كارهها و مبغضها ومسبب ذلتها!!!
وعجبى كل العجب من بنى أدم وأنا فيهم
وأولهم ولاتسألونى عن السبب لئن عرفته لبطل عندى كل العجب

سكت الكلام

سكت الكلام
وراح مجاش؟
وفات وراه
ايد على خد
وعين فى الارض
ودماغ حيرانه
ونفوس تعبانه ؟
سكت الكلام
وراح مجاش ؟؟
وفات وراه انسان
حزنه معشش فى الاركان
ونفسه داخل وطالع زهقان؟
سكت الكلام
وراح مجاش؟؟
وساب وراه ضفيرة لسه متجدلتش
ودمعة وقفت ولا نزلتش
وأحلام هربت ولا رجعتش؟
سكت الكلام
وراح مجاش؟؟
ياريت يا حبيبتى
تفكيها شوية
دى الدنيا كلها
وعلى بعضها متسواش

لحظات الرحيل

ليلة شتوية بارده.... المطر بالخارج يسيل على زجاج النافذه كدموع تتساقط منهمرة دون توقف .
أجلس محتميا من الصقيع بملابس ثقيلة ...ممسكاً بين يدى بكتاب لم أقلب صفحته منذ ساعة ... وعلى ذلك الضوء الخافت ...تراقب عيناى
دون هدف تلك الظلال التى استقرت على ذلك البرواز الكبير المعلق فوق المدفأه.
لم أشعر بسقوط الكتاب من بين يدي ..حين تراخت ...أحسست بثقل الجفون و ......

وفجأة ...رأيته أمامى
كان متعباً جداً....يبدو وكأنه سار أميالاً دون توقف ...يتصبب منه العرق رغم برودة الجو...حقيقة ً لا أعرف أن كان عرق إجهاد أم دموع أحزان.
وجدته هزيلاً...تكسوه ملامح الضعف...أخذته بين يدي برفق
كانت عيناه ...تتراقص زائغة ....كتراقص لهب شمعة توشك أن تنطفىء وتخبو

راح يهمس ويحكى عن آلامه ..وذكرياته ....
اعتصره الالم مرارا ....وأرهقه الحزن كثيراً
أبلغنى أنه لم يجد الشفقة من أحد ....وكم اشتاق لأحباب لم يولوه اى اهتمام ...وكم وفى لمن لا يستحق.
وما كان ارهاقه هذا سوى من كثرة ماعاناه طوال سنى حياته...

فوجئت بزيادة نبضاته ...فبدأت أطمئنه ..
أنت لم تخطىء وانا أثق أنك قد فعلت كل مابوسعك لتحافظ على أمانتك
ابتسم ابتسامة واهنة ...وقال لى فى خفوت : هل أنت نادم على مرافقتى لك ؟؟
أجبته : لقد كنت نعم الصديق ورغم ما عانيته منك ...إلا أنى مدرك جداً أنى فى النهاية أنت لى وأنا لك
ازدادت نبضاته جدا....وتراقصت عيناه أكثر ...وأرتسمت عليه بسمة ارتياح عذبه جدا
ثم سكن بلا حراك

وقفت كل نبضاته......وانطفئت تلك اللمعة البراقة التى كانت تكسوه
شعرت بعد دقائق بدفء الدموع التى انسابت على وجنتى
واغمضت عيناى ....بينما ارتعشت يداى جدا وأنا أحمله بين راحتى

سكن قلبى
استراح ...بعد ماعاناه من تعب وشقاء
كان هذا لقائنا الأخير....جاء ليودعنى ..
كم جاءنى باسما متهللاً .مطمئنا لحب جديد . وكم حذرته من اندفاعه..والأن ماعاد يفيد شىء
جنى على نفسه و استسلم بطيبته لكل أوامر الهوى ...ولبى طائعا كل نداءات العشق.
فتحت عيناى لأجد راحة يدى اليمنى فوق موضع قلبى
ولم أدرك حتى الأن ....هل أخذتنى غفوة نوم !!!أم أن قلبى كان فى وداعى قبل رحيله

أول الضحايا

خلاص...إرتحتى ...وكتبتى بإيدك النهاية
خلاص...هديتى ...وختمتى فصول الروايه
وأنا من طيبتى وصفو قلبى
كنت فاكر إن معاكى البداية
أعاهدك وعهدى صادق كما عادتى
ماعدت أفترض فى بشر حسن النوايا
أعاهدك وقلبى صارخ مابين ضلوعى
ماعدت ابتدى تانى فى حكاية
إلا وهاخد بتار قلبى
من كل حوا ماصدقت يوم معايا
أعاهدك لأتقن المكر والحيلة
ويبقى طبعى أنا وبس ....وما سوايا
وهتعلم أجى باسم وسنى ضاحك
وخنجرى المسموم مخفى ورايا
وهتعلم أطعن وما أشفق
وينكتب على صدرى قاتل
وفى الحقيقة أنا أول الضحايا

عايز تمشى

عايز تمشى ..؟ مع السلامة
مبقاش فيه...خلاص ندامه
خلتنى احس الملل
ضيعت بعندك كل الامل
مُصر أنى كذا وكذا
بعدك خلاص مبقاش أذى
يمكن العكس صدقنى
بعد ماكانت مشاعرى ليك بتسبقنى
بقيت خلاص
لوشفتك همشى فى شارع تانى
ياجارحنى فى كل وجدانى
تحفرلى حفرة الغلط
وتزقنى ...وتقول عليا أنا القاصد
عملت ايه غير انى حبيتك
خلاص معدش قلبى سكنك ولا بيتك
أخرج...من غير مطرود
وانسانى ...ولو بموت
ماهستنى دوايا لوفى إيدك
معدش باقى فى ودانى
من صدى صوتك غير مرار
معدش جوايا غير رغبة فى الفرار
من سجن الملل اللى عيشتنى فيه
ولولا ايمانى بربى
لكنت فضلت عن قربك الانتحار

نص حب

بتحبينى....نص حب !!
صدق ده ولا كدب ؟؟
ويعنى ايه نص حب ؟؟
انتى ليكى نص قلب ؟؟
بتحبينى ومابتكرهيهوش ؟؟
يعنى أعيش نص عمر
والنص التانى ماشفهوش ؟
بتفكرى فيه وفيا ؟؟
وتقولى لى متعملهاش قضية
طب كلمة واحشنى امبارح
كانت ليه ولا ليا ؟؟
ولمين فينا بتكونى وفيه ؟
لما بتكونى لوحدك
وعلى مين شوقك بيجرى
لما تتحرك مشاعرك ؟
هو نص وانا نص ؟
بتحبينى نص حب ؟
أنتى واثقة ان اللى جواكى
بيدق كده واسمه قلب ؟

خايف أوى

خايف ...خايف أوى
خايف لضى الأمل اللى فى عينيكى يكون أوهام
وأصحى ألاقى مشاعرك مجرد أحلام
خايف ..خايف أوى
لأكون وحدى ببنى قصور م الأمل
وينفتح على إيديكى جرح قلبى اللى اندمل
خايف ..خايف أوى
لبرد الشتا يجى يلاقينى وحيد
ويوم ربيع الحب مايجى .. يشوف قلبى كاسيه الجليد
خايف ...خايف أوى
لتغيب شمسى وليلى يطول ..مايجى نهار
وذنبى فى حبك ما ينمحى مهما دعيت ربى باستغفار
خايف ...خايف أوى
لعودى اللى انحنى فى حبك ماينعدل
وسر هوايا اللى انكشف ماينستر
خايف ...خايف أوى
لصلاتى فى محرابك ما تنقبل
وصومى اللى فرضته فى هواكى ينكسر
خايف ...خايف أوى
لدمع عينى يجف وما ترتوى
أرض محبتى منه وتبور
وتدوم الأحزان بقلبى و ما تنتهى
وينمحى من قاموس حياتى معنى السرور
خايف ..خايف أوى
ليوم دخول جثمانى فى لحدى
مالاقى سوى دمعى يرثينى
وانحرم من تكريم دموعك
ويتنسى حب سنينى
حبيبتى ..خايف ..خايف أوى

أكتوبر 2002 م ...... أخيرا ..اصبحت من حاملى المحمول ... هذا الاختراع والظاهرة اللى شغل بال كل المصريين وادخل على مجتمعنا مصطلحات جديدة
من قبيل (( ادينى رنة واكلمك )) (( انا صحيت لاقيت ميسدين )) وفى نهاية لقاء اتنين بقى بدل كلمة سلام او اشوفك بكرة بقت(( على رنات بقى )) و (( مسدات ..اوك )) وبقى الحبيبين يقولوا لبعض(( اوعى تنام من غير ما ترنلى )) ..فين ايام(( ابقى بصى للقمر وقول بحبك)) !! ,ولا (( هرنلك على تليفون البيت مرتين ورا بعض تعرف انه أنا )) قبل مايخترعوا المدعوق اظهار الرقم .
وبقينا نقول لو حد أتاخر علينا (( ده انا مديله ميت ميسد و2 اس ام اس وبرضه مجاش )) ونفضل نرن ونرن عليه برخامه وبعند واصرار واول ما يفتح
نصرخ ( أنت فين يا ...............)) هسيب fill in the space دى حسب ثقافة كل واحد فى ا لنرفزة .
ومش بس كده ظهرت كمان مهن جديدة وبقينا نشوف محلات مكتوب عليها (( ملك المحمول )) مع أنى مكنتش اعرف غير ملك الكبدة اللى فى وسط البلد
(( ميسد كول لخدمات المحمول )) (( رنين )) ((دكتور المحمول )) وبقى فيها صيانه محمول , رنات , سوفت و بيع شراء استبدال و............و ............. .
كل ده جميل وجيد وحلو لكن منذ أن ــــ حلو منذ أن دى ــــ حملت ذلك المحمول وتغيرت حاجات كتير فى حياتى فقدت شىء مهم جدا فى حياتى
ألا وهو الخصوصية يا سادة , أيوة أذكر ذلك الموقف تماما , كنت أعمل كمدير مبيعات فى احدى الشركات الخاصة فى ذلك التوقيت اللى جبت فيه
المحمول ومن يوميها حسيت انى مطارد .... وانا نايم فى أمان الله ألاقى اخينا بيررررررررن ألو .... ايوة انت فين تعال حالاً فيه Meeting
ياربى قبلها بشهر مكنوش بيعرفوا يوصلولى انا اللى جبته لنفسى ........ وبدأت اعود نفسى على السؤال الرخم اللى اصبح لا يفارق لسان المتكلم
(( أنت فين ؟؟؟)) السؤال اللى مكنتش متوقع ان حد هيسألهونى غير المزغوده ــ لا مؤاخذه ــ اللى هارتبط بيها بعد عمر طويييييييييل
وبقيت معتاد على السؤال ده لدرجة انى بقيت افتح التليفون أقول على طول أيوة انا فى المكان الفلانى .
ولأنى صراحة يعنى محبش اكدب فبقيت اسكت احيانا مش عارف اقول ايه . وأصبح اللى يكلمنى عارف امتى بكون على سريرى او باكل او فى الشارع
لحد ما فى يوم رن محمولى اللى انا شايله وهو شاللنى وكنت لامؤاخذاه احم ....احم ..... يعنى فى بيت الادب اللى فى الشركة
وفضل صاحبنا يعزف فى مقطوعته ويعيد ويزيد وانا مش عارف اعمل ايه ...أركز فى ايه ولا ايه .. فتحت التليفون ألوووووووووو
وجاء عبر الأثير صوت بلهجة حادة (( أنت فين يا مستر ؟؟)) فكان ردى مباشر (( أنا فى الحمام يا فندم ))
جاءت الضحكة مستفزة جدا ... وشعرت أنى أغتال فى خصوصيتى
ومن وقتها وانا فعلا نفسى اتكلم عن الموضوع ده وبعد تقريبا ً 8 سنوات تقرر فيهم اكتر من مرة انى استغنى عن هذا المتطفل
المسمى مجازاً تليفون محمول .بقيت احس أنه أتب فوق ظهرى . فلا عدت استطيع ان افلفص من اى ميعاد او من اى مشوار يخصنى كشخص او كعمل .
ومبقاش فيه حاجة اسمها Privacy . ممكن تلاقيه بيرن فى اى وقت ولو مردتش تبقى مصيبة , ولا لو اتلقى مقفول , ولا خارج النطاق
وخد عندك بقى .....
- أنت فين ؟؟ فى الشارع ؟؟؟ لا لا لا امال ايه الهدوء ده وبعدين أنا سامعة صدى صوتك أنت فى مكان مقفول . ( دى واحدة متصلة بجوزها )
- تليفونك مقفول ليييييييييه ؟؟؟؟ يعنى ايه مخلص شحن ؟.؟؟ مش مقتنع
- كان المفروض أول ما أديلك رنة تفهم أنى خلصت ..... وتيجى على طول .
- نااااااااااااااايم حضرتك وسايبنى ارن .
- ايه ده أنت بتاكل ...... معلش طب خلص ورن لى عاوزك ضرورى
ولا ......... ولا ........ هو صحيح يعنى سهل حاجات كتير وبقى سبوبة حلوة لناس كتيييييييييييييير
وبسم الله ماشاء الله .... 3 شركات مدلعينا خالص حاطين ايديهم فى جيوبنا ودفيانين ......واتعودنا عليهم خالص حتى العيال الصغيرة عارفينهم جدا
صدقونى خايف أصحى فى يوم ألاقى علم مصر بقى أحمر وبرتقالى وأخضر ...... وفى الوسط نسر ماسك موبايل .
انا نفسى ادخل الحمام براحتى.......... أنا أؤمن جدا بثلاث اشياء مايصحش نقاطع الانسان فيهم ابدااااااااااا
اولا الأكل .................... ثانيا النوم .................... ثالثا الحمااااااااام .
طيب بعد إذنكوا عشان تليفونى بيرررررررررررررن

لاوية بوز

زعلانه ومأموصة ولاوية البوز ؟؟

طب مانا كمان زيك مأموص

سم وكبه.......ويلا مالوش

لازمه حبك ..ومش هاعوز

عينيكى ولاقلبك ولا رقتك

مش عارفة عملت فيا إيه محبتك

خلتنى ابقى زى الأراجوز

24 ساعة بحايل وأراضى

وبقيت زى المنتخب

بتمنى الفوز

وانتى مباراة صعبه

مغلوب فيكى 7/1

وبالدعا لربى عليكى هالوذ

متصدقيش حبيبتى ده من ورا قلبى

لسه حبك جوا كراكون قلبى محجوز