طقت فى دماغى تانى
هصالحك بشكل تانى
وهتجنن جنون
هاجابلك حبيبتى بونبون
وكمان شيكولاته
وواحدة مصاص
ونجيب كمان جلاس
وهلبسك فستان ... قصير مش طويل
واعملك فيونكه.. م الهوا تطير
واخدك فى ايدى نمشى
والناس تقول دى مين ؟
أقولهم دى بنتى
ووقت الجد حبيبتى
بس احنا كده دايما
مش تقليديين
هنركب بسكلته
ونركب مراجيح
ونروح فى أى حته
زى ماتخدنا الريح
ونلف نلف ونيجى
ولسه إيدك فى ايدى
ولو قلتى عليا حبيبى يا مجنون
هقلك يا حبيبتى
كان حلو البونبون ؟
أنا مش هدخل معاكى أبدا فى حالة خصام
ولا هعمل فروض التقل وألاعيب الغرام
تبعدى ؟؟ هقرب
تخاصمى .. هاجى شايل مشاعرى وابدأ بالسلام
حرام حبيبتى نضيع ثانية ووشوشنا مش متقابله
عيونا مش متلاقية ... وساكت بينا الكلام
أنا هكسر قواعد ملت منها قصص العشاق
وهاجى رغم المشاكل وكلى اشتياق
أقلك وحشتينى .. وف حضنك نفسى أنام
فى امتحان حبى ليكى
قالولى ضع القلم
خلاص وقتك انتهى
وبقيت انا فى الم
ده لسه فاضل كتير
فى اجابتى ماقلتهوش
ويوم كمان معاكى
لسه موصفتهوش
طب ليه حرمونى انى
اقول اجابتى وافيه
ده لجنة صعبة خالص
والمدة مكنتش كافية
اقول عن سحر عيونك
ولا لمسة ايديكى
ولا اقول على قلبك
يالجنة الله يجازيكى
ده لسه سؤال رقتها
وحنانها اللى مش معقول
ياناس وجمال خطوتها
ده انا هصرخ واقول
ادونى مده تانية
هدخل فى دور مايو
واقول براحتى عنها
واخد ممتاز بحالـُه
أنا بهرب م الدنيا ليكى
وبلقى رَحب الطريق
برتاح قدام عينيكى
ولو كمجرد صديق
على هامش حبنا الدافى
بلاقى كتير معانى
واحة لما بعانى
وفنارى فى ليل غميق
أمى ف وقت الخطر
ورفيقتى ف رحلة سفر
وبنتى اللى حطانى
دايما ف حيرة وحذر
على هامش حبنا الدافى
بشوف فيكى كتير
ملكة وانا الأسير
عدالة وأنا الطريد
قلب لطفل شريد
وأحيانا حلم عنيد
على هامش حبنا الدافى
بشوفك عجيبة سابعة
ومستحيلة رابعة
وان جيتى للحق قلبى
محتاج منك متابعة
